मंडळी प्रधानमंत्री मुद्रा योजना (PMMY) ही केंद्र सरकारची महत्त्वाकांक्षी योजना आहे, जी सूक्ष्म, लघु आणि मध्यम उद्योगांना (MSME) आर्थिक सहाय्य उपलब्ध करून देते. मुद्रा (Micro Units Development & Refinance Agency Ltd.) या संस्थेमार्फत बँकांना निधी पुरवला जातो आणि बँका पात्र लाभार्थ्यांना हे कर्ज वितरीत करतात.
या योजनेअंतर्गत तीन प्रकारचे कर्ज दिले जाते:
शिशु योजना – नवीन व्यवसाय सुरू करू इच्छिणाऱ्या उद्योजकांसाठी, ज्या अंतर्गत ₹५०,००० पर्यंतचे कर्ज दिले जाते.
किशोर योजना – विस्तार करू इच्छिणाऱ्या लघु उद्योगांसाठी, ज्यात ₹५०,००० ते ₹५ लाख पर्यंतचे कर्ज उपलब्ध आहे.
तरुण योजना – स्थिर व्यवसायाच्या वाढीसाठी, ज्या अंतर्गत ₹५ लाख ते ₹१० लाख पर्यंतचे कर्ज दिले जाते.
या योजनेचा लाभ कोण घेऊ शकतो?
नवीन व्यवसाय सुरू करू इच्छिणारे उद्योजक, लघु व मध्यम उद्योग (MSME), सेवा उद्योग चालवणारे व्यापारी (दुकाने, वर्कशॉप, लघुउद्योग), शेतीपूरक व्यवसाय करणारे (डेअरी, कुक्कुटपालन, मत्स्यपालन) तसेच महिला उद्योजक या योजनेसाठी पात्र आहेत.
या योजनेचे काही महत्त्वाचे फायदे म्हणजे या कर्जासाठी कोणतीही तारण (गहाण) ठेवण्याची आवश्यकता नाही. यामध्ये तुलनेने कमी व्याजदर आहे आणि कर्ज मिळवण्यासाठी प्रक्रिया सोपी आहे. सरकारी, खाजगी व सहकारी बँकांमार्फत हे कर्ज सहज उपलब्ध होते, त्यामुळे नवीन व्यवसाय सुरू करण्यासाठी ही एक उत्तम संधी आहे.
कर्ज मिळवण्यासाठी आधार कार्ड, पॅन कार्ड, रहिवासी पुरावा (वीज बिल, रेशन कार्ड इ.), व्यवसाय नोंदणी संबंधित दस्तऐवज आणि बँक खाते तपशील आवश्यक आहेत.
या कर्जासाठी अर्ज करण्यासाठी राष्ट्रीयकृत बँका (SBI, PNB, BOB, BOI), खाजगी बँका (HDFC, ICICI, AXIS), ग्रामीण बँका आणि वित्तसंस्था (NBFC, MFIs) यांच्याशी संपर्क साधावा किंवा अधिक माहितीसाठी www.udyamimitra.in या संकेतस्थळावर ऑनलाईन अर्ज करावा.
हे लक्षात ठेवा की मुद्रा ही एक पुनर्वित्त संस्था आहे आणि ती थेट कोणत्याही व्यक्तीला कर्ज देत नाही. तसेच, या योजनेसाठी कोणतेही एजंट किंवा मध्यस्थ नियुक्त नाहीत. त्यामुळे फसवणुकीपासून सावध राहा आणि अधिकृत बँक किंवा वित्तसंस्थेशीच संपर्क साधा.
ही योजना उद्योजकांना आर्थिक स्थैर्य मिळवून देत असल्याने, जर तुम्ही तुमचा व्यवसाय सुरू करायचा किंवा विस्तार करायचा विचार करत असाल, तर प्रधानमंत्री मुद्रा योजनेचा लाभ अवश्य घ्या!
